සිතිවිලි...

තතක් පිරිමැද
මවන'යුරු නුඹ
හිතක් සනසන
ස්වරය නලවා..

තෙරක් නොදැනුන
සිතුම් සයුරක
ඇසක් නොසලා
බලා හිඳි මා..

ඉමක් නොපෙනෙන
පැතුම් අහුරක
හෙටක් සොයමින්
පෙරුම් පුරනා..

ඉඩක් නැතිවෙද

නුඹේ හද තුල
දුකක් හිත යට
අනිනු දැනුනා..

(හිත) පිදුම...

• පියෙකු සේ ස්නේහයෙන්
  තුරුළු කර ආදරෙන්
  ඉඩ දෙන්න නුඹ රැක ගන්න මට
  සනසා සිත නිවා..
  
  මවක ලඟ ආදරෙන්
  දැවටෙනා දරුවකු ලෙසින්
  ඉඩ දෙන්න හිත ලඟ ඉන්න මට
  දැවටී හිත වටා..
  
  
  ජීවිතේ මාවතේ
  පිය මනින්නට ඉතින්
  ඉඩ දෙන්න නුඹ ලඟ ඉන්න මට
  හැමදා හිත පුරා..

සරසවිය අභියස...

සිර කල ඉකිය මට නොහැඟෙන ලෙස සඟවා
සෙනෙහස   කැවූ  දෑතම  හිස  මත       රඳවා
ආසිරි   පතා   කඳුලැලි   නෙතු  යට      පුරවා
අම්මා   ගියා   මා   සරසවියට              බඳවා

නපුරු හීනයක්ද...

සොඳුරු සොයුරිය
ළබැඳි යෙහෙලිය
නුඹම විය
දිවි ගමන මැද ලද

පෙර පැතූ ලෙස
මිතු දමින් බැඳ
එක සිතින් විඳ
දුකද සතුටද

බොලඳ පෙම් බස්
කෙලි කවටකම්
සෙනෙහෙ රැඳි
ඒ සොඳුරු දඟ කම්

නෙතට සවනට
මැවේ යලි යලි
සිනහ නංවා
කඳුලු අතරින්

අඳුරු වැටුනද
ඉඳිමි හිඳගෙන
සොහොන ලඟ
ඇය නිදන නිහඬව

බලා ඉන්නෙමි
නපුරු හීනෙන්
අවදි වේ මා
කියා දැන් දැන්

අහිමිද ඇය..

නිමිත්ත-නායකත්ව පුහුණුවට සහභාගී වූවෙකුට වූ දෙයක් ;)

මුල්ම වරට නුඹ හිනැහුනු අන්දා

මුවග අහිංසක මදහස රන්දා

හෙලපු බැල්ම හිත සැනසුව හන්දා

මැවුනු සිතුම් සැනෙකින් සිත් බැන්දා

පෙර විඳ නැති මේ සිතිවිලි උස්සා

නුඹෙ තතු දැන ගන්නට හිත රුස්සා

කැරකුනු මුත් තිස්සෙම මේ පිස්සා

නුඹ ලඟ සිටි විට හිත පසු බැස්සා

අරුමෙකි මට නම් සිදු වී ඇත්තේ

නොදනිමි ඇගෙ නම,ගම කොයි පැත්තේ

තතු විමසන්නට කෙනෙකුගෙ මත්තේ

මින් පෙර මෙලෙසට නැත තැති ගත්තේ

පිපි අදහස් හිර වී හිත අස්සේ

දින අවසන් විය ගෙවුනු බූස්සේ

නුඹට හොරා මා එක් කළ රහසේ

මතකය පමණක් වැලපේ මනසේ